VAN DER MERWE, CHRIS N (1944 -) is ’n emeritus professor in Afrikaanse en Nederlandse letterkunde aan die Universiteit van Kaapstad. Hy verwerf BA, BA Hons, MA aan die Universiteit van Stellenbosch; daarna ’n doktoraal in Nederlandse taal-en letterkunde in die Nederlandse Taal- en Letterkunde aan die Universiteit van Utrecht (cum laude), en in 1976 aan die (destydse) Randse Afrikaanse Universiteit die graad DLitt et Phil. Hy is die skrywer, medeskrywer of redakteur van sewentien akademiese boeke, en het ook verskeie artikels in Afrikaans, Nederlands en Engels geskryf oor die Afrikaanse letterkunde en oor Literêre Teorie. Sy navorsing handel veral oor sosio-politieke kwessies en die verwoording van moraliteit en waarheid in die letterkunde.
Sy huidige navorsing fokus op narratiewe en trauma, en hy is die skrywer onder andere saam met Pumla Gobodo-Madikizela, van die boek Narrating our Healing: Perspectives on Working through Trauma (2007) en met Hans Ester, Twyfelaars wat glo. Van sy latere publikasies handel ook oor teologiese temas. Hy ontvang verskeie toekennings: Beurs van die Nederlands-Suid-Afrikaanse Vereniging vir studie aan die Universiteit van Utrecht, Toekenning as “Suid-Afrikaanse Boekejoernalis van die Jaar”, van die SA Akademie vir Wetenskap en Kuns die Gustav Preller-prys vir besondere bydrae tot die literatuurwetenskap asook die Elisabeth Eybersbeurs om in Nederland te werk aan ‘n navorsingsprojek oor “Narratief en trauma in Afrikaans en Nederlands”. Sedert 2006 lewer hy ook ’n belangrike bydrae tot die 2020-Vertaling van die Bybel in Afrikaans as letterkundige in ’n groot aantal boekspanne van die Ou en Nuwe Testament, asook in die Redaksionele Komitee Nuwe Testament.
0 Comments