JORDAAN is die belangrikste rivier in Palestina* wat van noord na suid vloei. Die rivier ontspring by Dan* in die noorde, vloei deur die See van Galilea*, en mond uiteindelik uit in die Dooie See (wat self geen uitloop het nie). Die vallei waarin dit vloei, is ’n vrugbare stuk aarde (hoewel dit na die suide al hoe meer onherbergsaam word soos wat dit dieper sink in die aardkors – selfs tot onder seevlak). Geen wonder dat Lot* die Jordaanstreek vir hom gekies het teenoor dit wat vir Abram (Abraham*) oorgebly het nie (Gen 13). Die Jordaan- skeurvallei, met die Jordaanrivier, die See van Galilea en die Dooie See, vorm deel van een van die wêreld se merkwaardigste geologiese formasies (wat tot in Sentraal-Afrika strek). Die Jordaanrivier vorm die agtergrond waarteen ’n hele aantal Bybelse verhale afspeel, bv die intog in die beloofde land, asook die doop van Jesus*.
0 Comments