HEMELVAART. Die direkte Skrif*getuienis oor Jesus* se hemelvaart tref ons in Lukas* se geskrifte aan, te wete Luk 24:50-53 en Hand 1:9-11. Dit verskyn as later toevoeging in die vroegste Evangelie – Mark 16:19-20. Lukas verbind hemelvaart aan die Pinksterfees*, en dit word vandag nog op die Donderdag ’n week voor Pinkstersondag gevier. Jesus se hemelvaart is opgeneem in die drie ekumeniese geloofsbelydenisse* van Nisea*, Atanasius* en die Twaalf Artikels*, en word algemeen in die Christelike* kerk* aanvaar as een van die kernbelydenisse oor Jesus Christus*. Die hemelvaart plaas klem op die Goddelikheid van Christus ná sy aardse vernedering, en benadruk sy hereniging met die Vader* en sy teenwoordigheid deur die Heilige Gees*. Hemelvaart simboliseer die krag van Christus om as Voorspraak vir ons op te tree, en om vir ons plek gereed te maak in die huis van die Vader. Sommige teoloë meen dat die hemelvaart – soos die maagdelike geboorte* – as mite*, en nie as fisiese werklikheid nie, vertolk moet word. Die hemelvaart beëindig Christus se eerste koms, en is die basis vir Christene se verwagting van sy glorieryke tweede koms.
Vir verdere lees:
(Verwys by “Vir verdere lees” na Coenie Burger se boek oor hemelvaart.)
0 Comments