GRIFFITH, PATRICK RAYMOND

GRIFFITH, PATRICK RAYMOND (1798–1862), ’n Ierse Dominikaan*, studeer in Dublin, Lissabon en Rome. Hy trek die aandag met sy goeie preke asook die versorging van sterwendes gedurende ’n cholera-epidemie in Dublin. In 1837 word hy gewy as Katolieke* biskop*, met standplaas Kaapstad, waar hy in 1838 arriveer. Hy stig skole en stel bekwame priesters*2 aan, ook in die Oostelike Provinsie. Een van hulle was dr Aidan Devereux, later eerste biskop van Grahamstad. In 1841 lê Griffith die hoeksteen van die Maria-katedraal in Kaapstad en, ná 10 jaar van groot persoonlike opoffering, kon hy dit inwy. Hy word allerweë beskou as die grondlegger van die Katolieke Kerk* in Suid-Afrika. Met sy aankoms was daar 700 lidmate rondom Kaapstad, en by sy dood was daar 30 000 in alle dele van die land.

Kommentaar

Ons wil graag van jou hoor ... gee jou kommentaar

Maak 'n opvolg-bydrae

Jou e-posadres sal nie gepubliseer word nie. Verpligte velde word met * aangedui

Sidebar